(खान्देश वार्ता)-धुळे
शहरालगत असलेल्या अवधान शिवारातील मोहाडी पोलीस स्टेशनच्या समोर न्यू बालाजी प्लायवुडचे गोडाऊन फोडल्याची घटना शनिवारी पहाटे उघडकीस आली आहे. अज्ञात चोरट्यांनी गोडाऊनचे शटर उचकाऊन आत प्रवेश करत लॉकरमध्ये ठेवलेले ६ लाख रुपये लांबवत पोबारा केला आहे. दरम्यान मोहाडी पोलीस ठाण्याच्या हाकेच्या अंतरावर झालेल्या धाडसी चोरीमुळे एकच खडबड उडाली आहे.
अवधान शिवारातील मोहाडी पोलीस स्टेशनसमोर असलेल्या न्यू बालाजी प्लायवूडचे गोडाऊन मध्यरात्री काही अज्ञात तोरट्यांनी फोडत आत प्रवेश करीत काउंटर मध्ये ठेवलेले ६ लाख रुपये घेऊन पोबारा केला आहे. सदर चोरीची घटना पहाटे वाचमनच्या लक्षात आल्यानंतर त्याने तात्काळ बालाजी प्लायचे मालक श्री.पिंगळे यांच्याशी संपर्क केल्याने त्यांनी सदर चोरी झाल्याची माहिती मोहाडी पोलिसांना दिली.
मोहाडी पोलिसांसह स्थानिक गुन्हे शाखेचे अधिकारी व कर्मचाऱ्यांनी घटनास्थळी धाव घेत तपास सुरू केला आहे. घटनास्थळी श्वान पथक व ठसे तज्ञ यांचेही टीम पोहोचली असून चोरट्यांचा शोध घेतला जात आहे. चोरीची घटना सीसीटीव्ही कॅमेरात कैद झाली असून अज्ञात तीन ते चार चोरटे हाप चड्डी घातलेले दिसून येत असल्याची माहिती पोलिसांनी दिली आहे. त्यामुळे जिल्ह्यात पुन्हा चड्डी गॅंग सक्रिय झाली का? अशी शंका पोलिसांकडून वर्तवण्यात येत आहे.
